Rev 5 | MHL | STEP | Aria yo feenap urufam, Saria Maneka pokap ikua nain-ke ona wapen akena-pa maifa maala wasiep-puamik nain opap ikua. Maifa nain opora mikikira ne kemena-pa siisimep-puamik, ne wasiemi ara kuisow kuisow ilenowa naep tana opaw-ikiwemik, nain ikur okaiwi-pa erup wuamik.

Revelation of John 5

Sipsip Muuka-ke maifa wasirkak

1 Aria yo feenap urufam, Saria Maneka pokap ikua nain-ke ona wapen akena-pa maifa maala wasiep-puamik nain opap ikua. Maifa nain opora mikikira ne kemena-pa siisimep-puamik, ne wasiemi ara kuisow kuisow ilenowa naep tana opaw-ikiwemik, nain ikur okaiwi-pa erup wuamik. 2 Ne aria ensel kekanow akena nain pun urufam, kerew akena feenap farem-ikua, “Mua naareke eliwa, naeya maifa tana opawap kaikap-puamik nain eliw iirarep wasirkinon?” 3 Naap farek nain mua kuisow-ko me kererek, owow iinan ensel, miiw mua, aria wi iiriw umemik nain pun, kuisow-ko me kererep wasirkap urufamik, weetak akena. 4 Aria yo naap urufap omem-ikem. 5 Omem-ikemkun mua iperowa oko-ke efa maakek, “No me omome! Urufe! Laiyon eena Yuuda kerekera-pa imenarek nain-ke iiriw nomakek. O Dewit nembesir-ke. Ikoka os-ke maifa kaikamik nain eliw wasirkinon.”

6 Ne aria naap ikok Sipsip Muuka-ko urufam, Saria pokap ikua nan iimarep ikua, ne maa erepam nain wi mua iperowa onaiya o warikap ikemik. Sipsip Muuka iiriw ifakimemik nain-ke imenarep nan iimarep ikua. Ikiwos suusa ikur okaiwi-pa erup ne mokoka pun naap ikur okaiwi-pa erup. Maa unowa nain Mua Maneka ona ewar unowa-ke, ona wia sesekeya miiwa oromi ononer ikiwemik. 7 Sipsip Muuka nain-ke ekap Saria Maneka maifa wapen akena-pa opap ikua nain wiar aawok. 8 Maifa nain aaweya maa erepam mokok enuma ikemik nain, wi iperowa ten erup erepam nainiya o kepur onoma-pa wiam wafurap maara mikami iima ifemakemik. Wi teeria nain wi kuisow kuisow maa oko gita saarik opap ikemik ne gol urupa pun opap ikemik. Urupa nain tepak-pa maa ikin eliwa awemi kawus urupem-ikua. Kawus ikin eliwa nain Mua Maneka teeria o faremi maakimik nain opora-ke. 9 Wiena someka enuma feenap awemik,

“No pepek, no Mua Maneka-ke, maifa nain teekap eliw wasirkinan. Moram no nefa ifakimiwkin aka nefar oreya wi emeria mua sesenarep wia aawon. Wi kerekera unowa nain, wiena opora ononer, miiw unowa ne mia sira-sira, wi nain unowiya wia aawep Mua Maneka pika kemena-pa wia wuan.
10 Ne teeria manek akena wia imeneya wi Mua Maneka anane maneka lotu onami patirimik. Ne ikoka wis-ke owow saria arep miiw unowa fain urufam-ikaikuan. Naapeya no maifa nain wasirkowa pepek eran.”
11 Aria yo kiiriw nainiw mokoka wuam-na wi ensel unow akena wia urufam, wia tuunowa me pepek. Saria pokap ikua nain, maa erepam mokok enuma ikemik nain ne wi iperowa nain unowiya wia warikap ikok someka feenap awemik,

12 “Sipsip Muuka ifakimemik nain pepek, naeya kekanowa, maa unowa, ne amis maneka, oona kekanowa ne unum maneka, parin maneka wiar ikaiya! Oo, i unuma wiar pirikua!”
13 Ne iinan maa unowa, miiwa ne ifera, ne miiw tepak maa unow maneka, wi unow onaiya feenap maemik,

“Mua pokap ikua nain Sipsip Muuka ikos opor eliwa ne unum maneka, parin maneka ne kekanowa anane anane naap wiar ikaiya!”
14 Naeya maa erepam mokok enuma ikemik nain-ke wia kiripomami maemik, “Makena!” Ne wi iperowa-ke keema muuna mikami Mua Maneka lotu onamik.